Հոգևոր և մշակութային արժեքների վերածնունդ
Արտյոմ Սարգսյան- Գեղանկարիչ, ոսկերիչ, զարդագործ։ Հանդես գալով, որպես
ժամանակակից արվեստագետ, իր հայացքը սևեռել է հայ ժողովրդի ակունքներին։ Նրա յուրաքանչյուր ստեղծագործություն՝ լինի դա գեղանկար թե զարդեր, կենցաղային իր, թե կահույք, ինչպես նաև դեկորատիվ կիրառական արվեստի մի շարք այլ գործեր՝ տարազից մինչև հոգեկերտվածք, համեմված է ազգային ոգու ուժով։Վերադառնալով հայ ՄԱՐԴՈՒ արմատներին, և նժարի վրա դնելով մարդու դարակազմիկ էությունն ու բանականությունը, Արտյոմ Սարգսյան արվեստագետն այսօր կարողանում է իր ստեղծագործություններով ներկայացնել ժամանակակից մարդկային մտածելակերպի առաքելությունը: Ստեղծագործությունների առանցքը հայ մարդն է, արիացին, որը ժամանակի ընթացքում վերափոխվելով ինչ-որ չափով կորցրել է իր ինքնությունն ու տեսակը, սակայն այդ նույն արիացին, այսօր էլ համարվում է հայ ընտանիքի «Կենաց ծառ»-ը, որի արմատները շատ խորն են ու կանգուն, և այս ամենը ամբողջանում է հայ կնոջ պայքարող կերպարով, որն էլ արվեստագետին օգնում է ստեղծել ու արարել:
«Կենաց ծառ» խորհուրդը Արտյոմ Սարգյանի համար դարձել է հայի կենսունակ, չձուլվող տեսակ:
Ստեղծագործությունների առանցքը էթնիկ ավանգարդ ոճն է, իսկ հենասյուները՝ ազգային միտքն ու ՀԱՅԸ:
Հայն ու Հայկական լեռնաշխարհն են, որ դարեր շարունակ կարողացել են թշնամուց պաշտպանել Ավետարանն ու Ծիրանենին:
ԾԻՐԱՆԵՆԻ․ տիեզերական պտուղ, մայր երկրի արևը, հայկական լեռնաշխարհի պարարտ հողն ու մեր նախնիների պայքարն ու կռիվը: Սա է, որ արվեստագետի համար դարձավ ոչ միայն արարման սկզբնաղբյուր, այլ նաև կնոջ ու մայրության սկիզբը խորհրդանշող, երկունքի ցավեր և պտղաբերության ծնունդ հանդիսացող «Երկունք Ծիրանի»:
Այս ամենին գալիս է լրացնելու գեղանկարչությունը, որը նրա ստեղծագործության ոգու ճիշտ պատճենն է: Այստեղ է, որ բացահայտվում է Արտյոմ Սարգսյանի ինքնատիպ տաղանդը: Գույների ներդաշնակության շնորհիվ նա կարողանում է ստեղծել պատմություն ու տրամադրություն, կոնտրաստային երանգների համադրման շնորհիվ ներկայացնել նրբերանգների մեղմությունն ու գույների ինտենսիվությունը:
Նրա գործերը բազմազան ու բազմաբնույթ են, թե՛ իրենց տեխնիկայով, և թե՛ կատարելավոճով:
Գործերի մեջ վառ կարդացվում է հայ տղամարդու առնականությունն ու ոգու ուժը, և հայ կնոջ փափկությունն ու խոնարհությունը, ինչը շատ բնորոշ է հայ ավանդական ընտանիքին։
![](https://blogger.googleusercontent.com/img/b/R29vZ2xl/AVvXsEhwVG3KR_DOSQaECTX-JvCgD9WuW0gs9SwMSehWgPou_xs-iBkhGrsX2smLRZTE6DxZMMcM_SEW3eSS_JD_GdOEF5ztgThSXB29yY4DtJTk9aitPxMbheR0g8AxW6fHO08UD3cPs157vkk/s320-rw/91174906_1861370890661577_2737745057938407424_n.jpg)
![](https://blogger.googleusercontent.com/img/b/R29vZ2xl/AVvXsEhIIyVLRRgAzIsEvztzbIpqG17E35IajeLa7nC2IOAZTfa7il6lkgVAXAuM9WLYGljM0o9nnK5_RCB4Mvnh9huzMZP8khCZ5iSW3fAv9JsFy0sJqinvGCI5Oohg_VnUr30gWZEJll17D4U/s200-rw/90298862_1861371037328229_5729321390285258752_o.jpg)